فراس وفيروز كانوا بيتخانقوا خناقة بسيطة على لعبة كل واحد عايز ياخدها لنفسه، المهم أنا اسأت التوقيت وناديت على فيروز عشان تجيبلي كباية مية. في العادة فيروز ما بتحبش تشوف حد محتاج حاجة وتتأخر عنه، فللأسف سابت الخناقة وجت جابتلي المية بس عنيها كان فيها نظرة إحباط إني ضيعت عليها حقها وفراس استغل الموقف واخد اللعبة لعب بيها.
نظرة الإحباط ديه ضايقتني جدا بس في نفس الوقت انا ما كنتش معاهم من اول الخناقة ومش عارف تفاصيلها ومش عارف مين اللي ليه حق يلعب بيها فبرده مينفعش انادي على فراس اقوله ادي اللعبة لاختك، ساعتها حسيت اني بوظت حاجة بكباية المية اللي طلبتها مش في وقتها ديه ولازم اتصرف. فناديت على فراس وقلتله امسك اللعبة من ناحية وخلي فيروز تمسكها من ناحية، سمعوا الكلام واول ما مسكوها هم الاتنين قلتلهم يلا كملوا خناقة بقى 😀 الاتنين راحوا ميتين من الضح وبقوا يقعوا في الارض فعلا من الضحك 😀 ونسيوا الخناقة، فراس نسي انه كان عايز اللعبة لوحده وفيروز نسيت انها كانت محبطة اني ضيعت حقها وكملوا لعب مع بعض لغاية اخر اليوم 😀
عشان كدة كنت دايماً بقول مفيش حاجة اسمها قواعد التربية، مفيش حاجة اسمها كتاب او تعليمات يعلموك تتصرف ازاي في الموقف الفلاني، التربية محتاجة ديناميكية عالية جداً ومرونة حسب كل موقف، حتى لو المرونة ديه تطلبت في مرة إنك تقول لولادك اتخانقوا مع بعض. في مصطلح كنت طلعته قبل كدة اسمه ترمومتر التربية. التربية محتاجة يكون معاك ترمومتر بتقيس بيه ولادك كل لحظة، بتقيس بيه نفسيتهم، اضطراباتهم نظراتهم، نتايج كلامك معاهم، نتايج مواقفك والحاجات اللي انت بوظتها وانت بتربيهم، وبناءً على الترمومتر ده بتبدأ تتحرك وتقرر تعمل ايه الخطوة الجاية وتغير ايه وتستمر على ايه، وانت لازم يكون عندك الذكاء والوعي الكافي انك تتصرف حسب نتايج الترمومتر ده مش حسب القواعد بتقول ايه.
