ستيفين هوكينج اتولد سنة ١٩٤٢ وأثناء دراسته في جامعة أوكسفورد سنة ١٩٦٠ بدأ يحصله مشاكل في الكلام والمشي واستخدم عكاز وفقد قدرته على الكتابة، الأطباء صنفوا حالته سنة ١٩٦٣ إنه مصاب بمرض قاتل اسمه “Amyotrophic Lateral Sclerosis” أو “التصلب الجانبي الضموري (ترجمة جوجل)” كان ساعتها عمره ٢١ سنة، وتوقعوا وفاته في خلال سنتين على الأكثر.
حالته بدأت تتدهور لغاية ما فقد قدرته على الحركة والكلام تماما. الحاجة الوحيدة اللي كان بيعرف يحركها هي عينه. وكان أهله بس اللي بيفهموه وبيوصلوا كلامه للناس.
في ١٩٦٤ ورغم مرضه وتوقعات موته، خطب صديقة أخته واتجوز سنة ١٩٦٥. وتجاوز عمره الفترة اللي توقعها الأطباء واستمر في الإنجازات في مجال الفيزياء لغاية ما اتوفى انهاردة وهو عنده ٧٤ سنة. يعني عاش ٥٣ سنة فوق المتوقع، ٥٣ سنة كلها إنجازات وأبحاث في علوم الكون والفيزياء والثقوب السوداء.
ورغم شلل جسمه بالكامل وعدم قدرته على الكلام. أصدقائه الفيزيائيين ساعدوه ووفروا برنامج اسمه Equalizer على جهاز Apple متثبت على كرسيه، كان بياخد المعلومات منه من خلال تحريك صابعه بأبسط حركة ممكنة، والجهاز بيتوقع الكلام وينطق بداله وبيطلع كلام مفهوم. كان بيقدر يتكلم بالجهاز ده ١٥ كلمة في الدقيقة لغاية ما عصب صابعه توقف تماما.
وبسبب قيمة ستيفين هوكينج العلمية. قررت شركة إنتل دعمه وتخصيص فريق بحثي لتطوير الجهاز إنه يستشعر إهتزازات الخد بدل حركات الصابع ويحول الاهتزازات لكلام. وبالطريقة ديه قدر ستيفين يتكلم ويتحكم في الكرسي ويتواصل مع الناس ويدرس ويعلم ويبحث ويطلع في برامج تلفزيونية ويكتب كتب ويبحث على النت ويعمل كل حاجة أي إنسان طبيعي ما يقدرش يعملها.
الناس المقربين منه بيأكدوا إنه كان بيرفض أي مساعدات. وكان مستحيل يذكر مرضه أو يشتكي منه.
ديه محاضرة لستيفين هوكين بيتكلم عن الثقوب السوداء باستخدام الجهاز اللي عملته إنتل.
https://goo.gl/sNB96j
وديه كل حاجة عن حياته وإنجازاته من ويكيبيديا:
https://goo.gl/NZxFd7
