بلعب لعبة مع فراس وفيروز كل واحد يرفع إيده ونزغزغه عشر ثواني من غير ما يحرك ايده خالص، ولو حركها يخسر، طبعا أنا نزلتها قبل الثواني ما تبدأ، فراس بطل استحمل تلات ثواني وفيروز بقى سوبر بطلة استحملت العشر ثواني كلهم وهي سرحانة وبتحاول تدير جسمها بشكل عبقري عشان تسيطر على الزغزغة مع العلم انها بره اللعبة ديه ما بتستحملهاش.
لما دخلت مع سارَّة الولادة الدكتورة كانت رافضة وبتقولي إن الموضوع صعب عليك ومش هتستحمله، أنا كنت عارف إن الولادة صعبة وصممت أدخل بس اكتشفت إني ما كنتش مدرك حجم الصعوبة، ومع ذلك الدكتورة كانت مشفقة عليا أنا رغم إن سارَّة اللي بتولد، في اليوم ده أنا شفت كمية قوة وتحمل وسوبر بطولة عند الستات مفيش راجل يقدر يستحمل جزء صغير منها لمدة دقيقة في حياته وهو مبسوط وراضي ويقرر يخوض التجربة تاني وتالت ورابع. بعد ما حضرت الولادة أنا زاد عندي كمية احترام مش طبيعية لكل ما هو يخص المرأة وانصح أي دكتورة أو دكتور ما ترفضش الموضوع لأي زوج عشان مفيد للطرفين ومفيد للزوج انه يستوعب حجم وعظمة الزوجة والأم اللي عظمتهم واضحة لكن تحتاج استيعاب أكبر عشان الموضوع يفوق استيعابنا.
أنا زوج اقدر اصنف نفسي محترم مع زوجتي وولادي وعندي رغبة كبيرة في إني اسهل واخفف عنهم كتير، ومع ذلك لما بحاول مجرد محاولة اقوم بدور سارَّة لبعض الدقايق، أنا بعجز حرفياً، بحس إني شخص معندهوش أي قوة أو مهارة جنب قوة سارَّة وامي وامها وأي أم قابلتها كل كدة.
المشكلة إن في صورة اجتماعية منتشرة وواصلة لغاية عقول البنات نفسهم إنهم كائن ضعيف، الصورة ديه انتهاك لحقيقة المرأة وعظمتها يا جماعة، فانا حبيت اكتب الكلام ده بعد تعامل غير مباشر مع بنات كتير وتعامل مباشر مع زوجتي وبنتي أقولكم فيه إن البنات سوبر أبطال والله يا جماعة، البنات عندهم قوة وتحمل وإصرار وشجاعة مش موجودة عند رجالة كتير، عشان كدة ما تخليش أي شخص في العالم يحسسك إنك مش قادرة تعملي حاجة، ما تخليش حد أبداً يصورلك إنك كائن ضعيف ومش هتستحملي الولادة الطبيعية، ما تخليش حد يصورلك انك مش هتعرفي تربي أطفال كويس، ما تخليش حد يصورلك إن الحياة صعبة عليكي عشان انتي تقدري تعملي حاجات رجالة كتير مش هيقدروا يكملوها ولو جربوها لثواني هيقفوا احتراماً ليكي طول العمر.
